BACOLOD CITY , Philippines — Tulo ka tawo ang nakalas ug napulo ang nangaangol human mawad-i og kontrol ang usa ka Ceres bus ug midaro sa duha ka balay daplin sa highway sa lungsod sa E.B. Magalona, Negros Occidental niadtong Martes sa hapon.
Sumala pa ni Inspector Leonardo Cobing, deputy chief sa E. B. Magalona Police, ang mga nakalas mao sila si Florida Pelagio, 6-anyos niining anak nga si Gaspar, ug ang usa pa ka tuig nga si Jillianne Lamis.
Samtang ang mga nangaangol giila ni Cobing nga mao sila si Geraldine Lamis, 27, ug Wilma Sales, 12, kinsa parehong napasok ilawom sa bus ug grabe ang kahimtang.
Naangol usab ang mga anak ni Florida nga sila si Geraldine, 14, ug Gabriel, nga upat pa ka bulan, Aspril Jereme, 13, Ma. Joanna Rose Mae Delfin, 16, Alexis Penuela, 19 ug duha ka pasahero sa bus nga sila si Ian Asuyon, 17,ug Merile Bagyo, 49, pulos taga Victorias City, ug usa ka wala pa mailhing pasahero. Ang mga biktima gidala sa Bacolod Doctor's Hospital ug Corazon Locsin Montelibano Memorial Regional Hospital sa Bacolod.
Base sa imbestigasyon ang drayber nga si Jess Martinez, 44, giingong misuway og overtake sa nag-unang sakyanan apan mibalik kini sa pwesto pagkakita sa kasugat nga trak, apan sa pagbalik niini sa lane diriyot niining naigo ang sakyanan sa atubangan hinungdan nga mi-brake kini apan nawad-an hinuon kini og kontrol sa manobela ug gidaro ang duha ka balay ingon man ang nagtapok nga mga residente nga nagduwa og bingo.
Human maigo ang kabalayan nahagbong sa kanal ang maong bus. Ang drayber malinawong mitahan sa kapolisan human sa hitabo. Giingong mipadala na og hinabang ang tag-iya sa maong bus pasaheroan ngadto sa biktima. (BANAT NEWS)