CEBU, Philippines - Kritikal ang kahimtang sa usa ka tanod human kini dunggaba sa usa ka gihulagway nga bugoy- bugoy nga lalaki kinsa nasuko nga gibadlong kay nagpataka og parking sa iyang motorsiklo didto sa barangay Buenavista siyudad sa Carcar niadtong Domingo sa alas 4:30 sa hapon.
Ang biktima mao si Dindo Saraum, 42 , minyo ug tanod sa maong lugar, samtang ang suspek mao si Edwin Ramos, hingkod nga silingan ra sa biktima ug gihulagway nga bugoy- bugoy sa maong dapit.
Si SPO3 Jorame Tanudtanud sa Carcar City Police Station mibutyag sa Banat News nga ang biktima giingong mibadlong sa suspek tungod kay ang motor niini nakaabong sa agianan, apan matud pa mihiwasa kuno sa kasuko ang suspek dayon gidukol niini ang ulo sa biktima.
Apan gumikan sa kaabtik milihay sa biktima, wa maigo sa pagdukol sa suspek hinungdan nga misamot sa kasuko ang naulahi dayon gilanit ang kutsilyo nga iyang dala ug dihang mitalikod ang biktima gihansakan ang buko-buko niini dayung sibat sakay sa iyang motor pahilayo.
Ang biktima daling gihatud sa Carcar City District Hospital apan gibalhin kini sa tambalanan dinhi sa dakbayan sa Sugbo .
Dugang nahipos nga impormasyon sa kapolisan nagkanayon nga ang suspek gitumbok nga badlongon gyud sa maong lugar ug matud pa daghan na ang mga nangreklamo niini apan wala mapasakai og kaso tungod kay inila sa mga opisyal sa maong lugar. Padayon pa nga gipangita sa kapolisan ang suspetsado.( /WC) (BANAT NEWS)