CEBU, Philippines - Patay ang usa ka lalaki dihang naugbok ang ulo niini ug nangabalian og mga bukton tungod sa pagkasampak niini sa railings sa Marcelo Fernan Bridge sa habig sa barangay Pusok, dakbayan sa Lapulapu alas-10 pasado na ang takna Biyernes sa gabii.
Ang namatay mao si Joe Nino Paradela, 24, nagtrabaho sa Mactan Export Processing sa dakbayan sa Lapulapu ug nagpuyo sa Villa San Nicolas sa barangay Basak, dakbayan sa Sugbo.
Si PO2 Joven Pino sa traffic division sa Lapulapu City Police Office traffic division nga nahinabi sa Banat News miingon nga padung sa trabaho ang biktima dihang kini naaksidente sa gisakyang motorsiklo sa taytayan.
Matud pa kusog kaayo ang pagpadagan ni Paradela ug pag-abot sa kurbadahong bahin sa maong taytayan nawad-an kini og kontrol sa motorsiklo ug misampak sa puthaw nga railings.
Si Pino miingon nga namatay sa Cortes General Hospital ang biktima.(EIM)(BANAT NEWS)