CEBU, Philippines - Usa ka 4-anyos nga batang babaye ang namatay human maligsi ug malatayi sa usa ka-pasaheroang bus sa Barangay Dakit, siyudad sa Bogo niadtong Huwebes sa hapon.
Patay diha-diha si Ailyn Momongan human siya maligsi ug malatayi pa gayud sa usa ka Ceres Bus nga nagtangag og plaka nga GXJ 409 nga gimaneho ni Rico Sollano, 37, taga lungsod sa Borbon.
Sa imbestigasyon sa kapulisan sa Bogo, ang biktima kuyog ang iyang inahan nga nagbaklay daplin sa kalsada dihang kalit nga nakabuhi ang bata gikan sa kamot sa iyang inahan ug midagan tabok sa dalan apan nalabyan kini sa maong bus.
Patay ang bata diha-diha dayon tungod sa mga daghang kadaot nga iyang nahiaguman sa iyang lawas samtang boluntaryong mitahan sa mga pulis si Sollano ug gibuhian ra dayon human magkasabot ang pamilya sa bata. (EIM) (BANAT NEWS)