CEBU, Philippines - Patay ang usa ka 35-anyos nga lalaki human gitusak og bala sa duha ka lalaking nagmotor diha sa barangay Poblacion sa lungsod sa Compostela niadtong Huwebes sa alas 10:45 ang takna sa kagabhion.
Ang biktima mao si Joseph Pilapil Pumar, 35, taga sityo Seaside sa barangay Poblacion. Wala pa mailhi sa kapolisan si kinsa ang mga mamumuno nga luwan sa itom nga motorsiklo.
Matud ni PO2 Arnie Goc-ong, imbestigador sa Compostela Police Station dihang nahinabi sa Banat News, nagbarog daplin sa karsada ang biktima dihang kalit gihunongan sa itom nga motorsiklo ug ang angkas niini diretsong mipusil sa biktima.
Ang biktima nga naigo sa ulo, dughan ug abaga patay na pag-abot sa Eversely Hospital sa Jagobiao sa siyudad sa Mandaue.
Kalambigitan sa ilegal nga drugas ang gidudahang motibo sa kapolisan sa maong pagpatay. (/EIM) (BANAT NEWS)