CEBU, Philippines - Nakuptan og balik sa mga kamot sa awtoridad ang suspek sa pagpusil patay sa tulo ka manag-amahang biktima sa Leyte niadtong Mayo ning tuiga human siya mabangali sa nagsunod nga barko padung dinhi sa Sugbo diha sa kadagatan sa Romblon.
Ang maong suspek nga si Ronald Merino miabot niadtong milabay’ng gabii dinhi sa Sugbu luwan sa barkong Super Shuttle 8.
Si Merino nadakpan sa kapolisan pinasikad sa warrant of arrest gikan sa korte sa Leyte may labot sa pagpatay sa barangay kagawad sa Brgy. Imelda sa Hilongos, Leyte niadtong bulan sa Mayo sayo ning tuiga.
Matud pa ni Merino sa mga tigbalita giposasan siya sa mga polis escorts apan nakatulog sila nianang pagkagabii sa adlaw'ng Martes hinungdan nga nakahigayon siya paghushos sa iyang posas ug nakabuhi.
Sumala pa ni Merino mikuha siya og lifejacket dayon miambak sa barko. Gisuwayan pa unta pagpangita sa maong barko si Merino apan wala na kini igkita pa.
Tungod sa nahitabo nadelatar og tulo ka oras ang pag-abot sa MV Princess of the South nga maoy gisakyan kang Merino.
Ang mayor sa Hilongos nga si Mayor Jose Emery Roble kinsa diha sa pantalan uban sa mga sakop sa National Bureau of Investigation maoy misugat kang Merino diha sa Pier 8.
Buot karon nga paimbestigahan sa mayor ang kapolisan nga mi-escort kang Merino sa posibleng lapso sa ilang pagbantay sa suspek.
Si Merino nasigpatan sa usa sa mga apprentice sa Super Shuttle 8 kinsa daling mipahibalo sa ilang kapitan maong kini gihunongan ug gidala.
Gawas kang Merino suspek usab sa pagpatay kang Imelda barangay kagawad Vincent Lor ug duha ka mga anak niining lalaki nga nag-edad og 4 ug 6-anyos , ang amahan ni Merino nga si Romualdo kinsa nakaeskapo usab ug ang padayon pang gipangitang magsuong Rufino ug Rogelio Erit.
Si Lor ug duha ka mga anak luwan og motorsiklo padulong sa usa ka suba aron maghunad sa bag-ohay pang gituli niyang mga anak dihang kalit silang gipugakhang.
Patay dihadiha si Lor ug usa ka anak samtang ang ikaduhang anak niini nadala pa sa tambalanan ug didto nakatug-an sa mga pangalan sa mga suspek.
Mao na unta kini ang ikaduhang higayon nga nakaeskapo si Merino gikan sa kapolisan, niadtong Mayo 8 usa ka adlaw human sa pagpamusil gironda sa grupo ni Chief Insp. Virgilio Plaza ang gitagoan sa mga suspek apan nakalayat sa bintana si Merino samtang nadakpan ang iyang amahang si Romualdo.
Apan paglabay sa usa ka buwan nakaeskapo usab si Romualdo sa karsel sa Hilongos police station niadtong Hunyo 2. Niadtong Hulyo 5 gipagawas ni Regional Trial Court-branch 18 ang arrest warrant batok sa mga suspek sa kasong multiple murder (docketed under CC NR H-2039).
Samtang si Atty. Bernard dela Cruz ang senior agent sa NBI-7 mibutyag nga prayoridad nila karon ang pagsikop sa uban pang mga suspek. (BANAT NEWS)