CEBU, Philippines - Mokabat sa dul-an P200 mil ang kantidad sa kwarta nga nasakiyo sa usa ka armadong tawo nga mitulis sa kahera sa Dela Salle Andres Soriano Memorial College (DSASMC) sa barangay Lutopan syudad sa Toledo kagahapon sa alas 8:00 sa buntag. Ang biktima mao si Connie Cimafranca, hingkod ug kahera sa DSASMC.
Mitug-an ang biktima ngadto sa kapolisan nga wala siya makabantay sa wala hiilhing lalaki nga nakasulod sa iyang opisina diin gitionan dayon siya niini og armas de fuego.
Gumikan sa iyang kabalaka nga patyon, wala siya molihok ug gipasagdan niya nga gikuha sa tulisan ang kuwarta gikan sa iyang drawer.
Human makuha ang kuwarta nga dul-ang P200 mil, dali kaayong migawas ang tulisan ug didto pa siya makasinggit uban sa pagpangayo og panabang
Ang presidente sa maong tunghaan nga si Dr. Genesa Paragados nagkanayon nga sa sayo pa naglingkod-lingkod ra ang maong tulisan tipon sa mga ginikanan sa mga estudyante duol sa accounting office ug nagtuo gani ang kadaghanan nga usa usab kini ka ginikanan kay suhito man kaayo sa tulunghaan.
Ang nasakiyo nga kantidad mao ang kinitaan sa tunghaan gikan sa mga binayad nga tuition fee sa mga estudyante atol sa unang adlaw sa ilang periodical exam. Human sa duha kapin ka oras, napalgan sa duha ka tinun-an sa DAS National High school ang bag nga adunay sulod nga karsones, jacket ug kwarta nga nagkantidad og P90,500 nga gituohang iya sa tulisan ug ang kuwarta nga sulod niini bahin sa natulis gikan sa eskuylahan.
Sila si Mike Joseph Obado,19 ug Jojie Esquierdo, 16 mibutyag nga ilang nakit-an ang maong bag sa may canal dapit sa ilang tunghaan sa ilang pag-agi sa maong lugar paingon sa basketbolan ug ila dayon kining gihatod ngadto sa eskuylahan.
Si SPO1 Thule Guzon Tahanlangit, sa Lutopan Police Station nagkanayon nga gilusad dayon nila ang hot pursuit operation nga gipangulohan sa ilang hepe nga si Supt. Henry Biñas. (Lesley Caminade-Vestil/WC) (BANAT NEWS)