CEBU, Philippines - Namatay ang kanhi barangay konsehal human kini mapunggit sa nagbaguros nga multicab sa dalan M.C. Briones sa barangay Tipolo, dakbayan sa Mandaue sa miaging gabii.
Ang biktima mao si Sergio Sanoria, 68, minyo, nga kanhi barangay konsehal sa barangay Tipolo ug nagpuyo usab sa maong lugar.
Si PO2 Rolando Gelido, imbestigador sa traffic division sa Mandaue City Police Office (MCPO) miila usab sa drayber sa Suzuki multicab nga maoy nakadasmag sa biktima nga mao si Leo Conde Pelayo, 51 , minyo, nga taga dalan Sanciangko sa dakbayan sa Sugbo.
Sa imbestigasyon ni PO2 Gelido nasuta nga gikan pa nga nagpalit og tambal sa atbang nga botika ang biktima ug sa paglabang niini sa karsada paingon sa pikas habig sa karsada wala niya mabantayi ang nagbaguros nga multicab hinungdan nga napunggit siya niini.
Ang biktima kinsa nakabaton og grabeng kadaot sa lawas ilabi na sa ulo nga nalamba sa sementadong karsada daling gihatod ngadto sa Mandaue City Hospital apan gideklarar kini sa mga doktor nga dead on arrival.
Si Pelayo nga mitahan sa iyang kaugalingon ngadto sa kapolisan sa maong dakbayan human sa maong aksidente kasamtangang gibalhog sa detention cell sa kapolisan sa Presinto 2 sa Subangdaku Police Station ug mag-atubang kini og kasong reckless imprudence resulting to homicide. (Romeo T. Limpangog/WC) (BANAT NEWS)