CEBU, Philippines - Usa ka 28-anyos nga mag-uuma nga giingong saksi sa usa ka kaso sa pagpatay ang nakit-ang patay na ug may samad pinusilan sa ulo sa bukirang barangay sa Manlapay sa lungsod sa Dalaguete niadtong Sabado sa alas 11:00 sa gabii.
Ang biktima nailhan nga si Jonathan Tabanao, alyas Tantan, 28, taga sitio Kayapokyapokan sa barangay Manlapay sa samang lungsod. Wala pa mailhi sa kapolisan ang mamumuno niini sa paghimo ning balita.
Apan sa dugang pakisusi sa kapulisan nahibaw-an nga ang biktima saksi diay kini sa kasong murder nga pending pa karon sa Regional Trial Court (RTC) Branch 26 sa lungsod sa Argao.
Matud ni PO2 Godofredo Glepa, ang desk officer sa Dalaguete Police Station dihang nahinabi sa Banat News kini mibutyag nga uwahing nakit-ang buhi ang biktima dihang mibisita kini sa pinuy-anan ni Alejandro Canete aron mamisita sa igsuon sa naulahi.
Apan pagkadayon nang tungang gabii nakit-an nalang ang biktima sa kanhi kagawad sa barangay nga si Benvienedo Sumbelon nga paingong maghatud og mga utanon sa Mantalongon nga nagbuy-od sa dalan nga naglunang sa kaugalingong dugo si Tabanao.
Sa pagsusi sa kapulisan nasuta nga dunay samad pinusulan sa ulo ang biktima ug nilapos sa walang bahin sa aping ug maoy nakaingon sa kamatayon niini.
Pipila ka mga saksi mibutyag nga nakadungog sila og andar sa motor sa maong lugar sa sayo pa ug pagkahuman nabati nila ang lanog nga buto sa armas.
Ang kapulisan misusi na aron matino kun may kalambigitan ba ang krimen sa kaso diin ang biktima maoy saksi. (Darrel A. Carumba/EIM) (BANAT NEWS)