CEBU, Philippines - Mikabat sa P6 mil kapin ang nasakiyo nga kuwarta ug cell phone sa nag-inusarang tulisan nga mitulis sa driver ug tindera nga nagsakay sa delivery van sa Dunkin Donut didto sa atubangan sa Gaisano Capital sa barangay Poblacion sa dakbayan sa Danao sa miaging gabii.
Ang mga biktima mao sila si Ermel Jumaoan, 23, minyo nga maoy drayber sa delivery ban ,ug Maylyn Octaviano, 21, nga maoy supervisor sales lady nga taga dalan Cabahug sa barangay Ibabao Estancia, dakbayan sa Mandaue.
Si SPO4 Edgar Gomez sa kapolisan sa maong dakbayan nga nahinabi sa Banat News miingon nga ang mga biktima gikan pa sa Gaisano Capital nga nangolekta sa halin sa ilang tindahan nga nahimutang sa sulod sa maong department store. Sa ilang paggawas dala ang salapi nga nagkantidad og P4,600 kapin ug misakay sila sa ilang delivery ban nga gi-parking sa parking area sa maong tindahan.
Dihang gipaandar na ni Jumaoan ang delivery ban kalit lang miduol ang wala hiilhing lalaki nga nagtaptap og panapton sa nawong ug misakay tupad kang Octaviano dayong tion niini sa iyang armas defuego ug mideklarar nga tulis.
Gimandoan sa maong lalaki ang drayber sa pagpadagan sa sakyanan uban sa pasidaan nga kun mosukol iya kining pusilon. Gumikan sa kahadlok sa drayber gipadagan niini ang sakyanan ug samtang nagdagan gipangayo usab sa tulisan ang dala nilang salapi ug ang ilang mga cell phone.
Dayon gipangayo niini ang usa ka lata nga dunkin donut nga may 13 ka perasong sulod, ug gimandoan ang drayber sa pagpahunong sa sakyanan dayong kanaog niini.
Igo lang naminghoy ang mga biktima ug wala kini nahimo gawas sa pagsumbong sa maong hitabo ngadto sa kapolisan sa maong dakbayan.
Padayon na nga gipangita sa kapolisan ang maong tulisan. (WC)(BANAT NEWS)