CEBU, Philippines - Nakabsan sa kinabuhi ang usa ka babayeng pasahero sa habal-habal human malamba ang maong sakyanan nga gisakyan niini didto sa Poblacion sa lungsod sa Ginatilan niadtong Biyernes sa ala 1:00 sa hapon.
Ang biktima mao si Cherry Sinco, 31, minyo, ug molupyo sa maong lugar, samtang ang drayber sa habal- habal nga iyang gisakyan nga igo lang na- angol mao si Wilfredo Cadungog, 42, minyo, nga taga Sitio Lulukhan, barangay Malat-o, Ginatilan.
Si PO1 Robert Dialimas sa Ginatilan Police Station mibutyag sa Banat News nga ang biktima mipakyaw sa habal-habal paingon sa lungsod kay motambong unta og seminar bahin sa goat raising. Apan dihang nagdulhog na sila sa bahada nga bahin sa karsada kalit lang nadakin-as ug nalamba ang motorsiklo ug nangalabay ang biktima ingon man ang drayber niini.
Namatay diha-diha ang biktima human mabagnos ang ulo niini sa semento nga karsada ug didto na ideklarar nga patay na sa Malabuyoc District Hospital.
Ang drayber kinsa gipagawas dayon sa tambalanan gumikan sa mga pangos ra ug bun-og sa lawas ang nahiagoman niini gibalhug dayon sa prisohan samtang gihikay dayon sa kapolisan ang kaso nga ipasaka batok kaniya. (WC)(BANAT NEWS)