CEBU, Philippines - Nagkadaghan ang nasakit og kidney disease dinhi sa nasud sumala pa sa mga tinugyanan sa panglawas sa rehiyon ug pagkapasar unya sa Sin Tax Bill giisip nga tubag unya sa dugay nang kakulangon sa tambal alang sa mga kabus nga nasakit niini.
Matud pa ni Dr. John Li nga usa ka Nephrologist ang pagpailawom sa urinalysis matag tuig gikinahanglan gyud aron mabantayan ang End-Stage Renal Disease (ESRD).
Sumala pa ni Li kinsa nabansay-bansay na ubos sa National Kidney and Transplant Institute (NKIT) 72 porsiyento sa mga Filipino ang dunay chronic kidney disease.
Sumala pa niya nga kini nga sakit usahay walay pamation sa lawas ang pasyente ug diha lang kini mogawas kung grabe na.
Niadtong milabay’ng semana tulo ka mga bag-ong pasyente ang na-diagnosed nga may ESRD sila gikan sa mga kabus nga pamilya.
Sumala pang Li sa edad nga 18-anyos kinahanglan nang magpa- urinalysis matag tuig samtang kadtong dunay dili maayong lifestyle sama sa dunay mga bisyo kinahanglang kaduha sa usa ka tuig sila magpa-urinalysis.
Naglakip sa kinahanglang mag-checkup kadtong dunay kaliwat nga may diabetes ug hypertension.
Ang urinalysis ang labing baratong pamaagi aron magpa-checkup sa kondisyon sa kidney aron sayong mahibaw-an kung duna kini deperensya sama sa ESRD.
Kun ang pasyente grabe na ang ESRD nagkinahanglan nang magpa-regular nga dialysis o ba kaha renal transplant aron mas motaas pa ang kinabuhi sa pasyente apan kini mas mahal.
Sa pagkakaron adunay 18 ka dialysis centers sa tibuok rehiyon ang 11 niini nia sa Sugbo apan gumikan sa nagkadaghang kaso sa maong sakit dinhi nagkaanam na usab kaproblema pag-atiman sa ilang panginahanglan.
Matud pa ni Ma. Ligaya Moneva sa Department of Health nga ang sakit sa kidney maoy ikapito nga nag-unang rason sa mortality rate sa Central Visayas ug kini usab anaa sa top 10 nga nag-unang hinungdan sa kaso sa pagkamatay sa Pilipinas.
Gipaabot nga kung mapasar na sa hingpit ang Sin Tax Bill mamenusan na unya ang mga pagbisyo sama sa pag-inom ug panigarilyo tungod sa kamahal na unya niini, ug madungagan ang pundo alang sa departamento sa maayong panglawas. (BANAT NEWS)