CEBU, Philippines - Ikaduha ang cervical cancer sa mga nag-unang hinungdan sa sayong pagkamatay sa mga kababayen-an sa Pilipinas sumala pa sa Bravehearts Coalition of the Philippines.
Ang Bravehearts Foundation usa ka non-profit organization nga nangampanya aron tabangan ang kababayen-an nga malikay sa sakit nga Cervical Cancer nga makuha gikan sa Human Papillomavirus (HPV).
Ang presidente sa Bravehearts Foundation Abbygale Arenas-de Leon, kanhi Bb. Pilipinas-Universe, ug usa pud ka Cervical Cancer advocate miingon nga nabalaka ang ilang grupo tungod kay base sa ilang pagtuon 80 porsiyento dinhi sa nasud ang posibleng aduna nay HPV.
Base sa pagtuon sa World Health Organization 4,500 ka mga Filipina ang mataptan og sakit nga Cervical Cancer ug kapin usa ka libo ang mamatay kanila sa matag tuig.
Matud pa sa grupo nga matag adlaw adunay 12 ka mga kababayen-an sa Pilipinas ang mamatay tungod sa maong sakit.
Tungod niini, giawhag ni De Leon ang kababayen-an nga batasanon ang pagpakunsolta sa mga doktor alang sa regular check-up ug pap smear.
“Dahil sa anak ko kaya ako nagpupursige. Gusto kong’ makita ang una niyang girlfriend. Gusto kong makita siya na ikinakasal, gusto kong makita ang mga apo ko,” matud ni Abbygale.
“I will take care of myself so I can take care of him,” dugang pa niya.
Gipasabot sab ni Abbygale nga ang Cervical Cancer ang nag-inusarang matang sa cancer nga mahimo pang malikayan pinaagi sa pagpabakuna.
Apan nasayran nga daghang kababayen-an ang dili makapabakuna batok sa maong sakit gumikan sa kamahal niini.
“Vaccine is just prevention, it’s not a cure. When you are already diagnosed with Cervical Cancer, vaccine is useless,” pagklaro ni Abbygale.
Dugang niya nga mahimo nang magpabakuna kun mag-edad na’g siyam ka tuig.
Usa sa proyektong buot nga himuon sa Bravehearts mao ang pagpalit og mobile bus clinics nga gamiton sa umaabot pa nilang kampanya batok Cervical Cancer. (BANAT NEWS)