CEBU, Philippines - Nasagmuyo pag-ayo si Cebu City Mayor Michael Rama sa gibuhat sa konseho sa siyudad sa Sugbo human sa pagpasar niini og resolusyon nga nagtugot kaniya nga makig-negotiate sa mga nag-okupar diha sa CitiCenter Commercial Complex sa barangay Kamagayan nga gipanag-iya sa syudad.
Sa maong resolution , buot sa Konseho nga makapadayon og puyo ang mga nag-okupar diha sulod sa CitiCenter gumikan kay wa pa’y igong gahin ang syudad alang sa giplano ni Rama nga tukurong housing project sa maong lugar.
Giingong gisugyot nila sa mayor ug sa mga nag-okupante sa CitiCenter nga magpinirmahay sa usa ka rental agreement. Kini nagpasabot nga mag-abang ang mga apektadong molupyo ngadto sa syudad samtang di pa sila papahawaon.
Gipadayag ni Rama nga dili mao ang lakang nga gihimo sa konseho gumikan kay ang susamang lakang magikan unta sa executive department.
Gipasidan-an usab ni Rama ang konseho nga duna nay nag-ung ong nga kaso kabahin niini ug angay nga itugyan na lang una kini sa korte.
Kahinumduman nga gipasakaan og kaso sa mga nag-okupar sa CitiCenter sila si Rama ug city administrator Atty. Jose Marie Poblete kinsa maoy mi-isyu og kamandoan sa pag-clear sa ilang gipuy-an.
Hugot gihapon ang baruganan sa mayor nga papahawaon ang mga okupante sa maong merkado human makadawat sila og report nga gihimo na kining pinuy-anan imbes nga mga tindahan.
Gawas pa niini giingong dunay mga wala mailhing mga tawong maoy nangolekta og abangan sa mga okupante. (BANAT NEWS)