CEBU, Philippines - Duha ka tawo ang naangol sa pagpamusil nga nahitabo sa lugar nga gitumbok nga Tau Gamma Country sa Sityo Suba, barangay Poblacion niadtong Miyerkules sa alas 11:35 sa gabii.
Ang mga biktima mao sila si Allan Abenir Jugalbot, 20 , ug Warren Bausal, 34, pulos mga molupyo sa maong lugar samtang padayon pang giila sa kapolisan ang tulo ka mga lalaking nag-angkasay sa motorsiklo nga maoy mipusil sa mga biktima.
Matud ni Insp. Socrates Medillo, ang bag-ong hepe sa Liloan Police Station dihang nahinabi sa Banat News naglingkod gawas sa ilang pinuy-anan ang mga biktima dihang kalit nangabot ang mga lalaking nagmotor ug mipaulan kanila og bala.
Giingong ang angkas nga naa sa tunga maoy giingong mipusil sa mga biktima ug pagkahuman miikyas sa wala matinong direksyon.
Ang biktima nga si Jugalbot naigo sa tuong bahin sa tiyan samtang si Bausal naigo sa tuong bahin ubos sa ilok ug gihatud sa Vicente Sotto Memorial Medical Center.
Matod ni Insp. Medillo gituohan nila nga ang mga mamumuno buot lang mohimo og gubot sanglit naila na ang lugar nga daghang namuyong mga sakop sa Tau Gamma Phi fraternity.
“Sa akong tan-aw pagsugnod lang tingali sa kagubot kay ilado man ang lugar. Sa ato pa Tau Gamma Country, kay dili man patay ang tuyo ato,” dugang asoy ni Insp. Medillo.
Ang kapulisan padayun sa hot pursuit operation sa mga responsable. (BANAT NEWS)