CEBU, Philippines - Usa ka maestro ug tag-iya sa usa ka pribadong eskwelahan ang mag-atubang og kasong sexual harassment ug child abuse human kini pasanginli nga nimolestiya sa 14-anyos nga estudyante samtang sakay sa school bus niadtong Oktobre 16 sa Barangay Marigondon, Lapu-Lapu City. Ang biktima matud pa na-trauma ug padayon pa nga gipailawom sa psychiatric examination.
Giingong nahitabo ang pagpangmolestiya samtang ang maestro maoy nag-drive sa school bus human mi-resign ang drayber niini. Human mahatod ang ubang estudyante giingong ang biktima na lang ug ang maestro ang nahibilin ug dinhi mihangyo ang maestro nga pakantahon ug patuparon kaniya ang biktima.
Taud-taud matud pa nga mihangyo ang maestro kung pwede ba siya mohawok sa aping sa biktima apan misugot ang biktima kay matud pa wala lang kini malisya alang kaniya apan kalit nga mihawok ang maestro sa ngabil ug migunit sa kinatawo sa biktima.
Mihatag pa gyud kuno og P30 ang maestro ug miingon nga dili pasabaon sa nahitabo. Apan human sa usa ka semana wala na motungha pa ang bata tungod sa kahadlok ug diha na misumbong sa iyang kasinatian sa mga kamot sa suspek. Human sa usa ka semana wala na mutungha pa ang biktima sa eskwelahan kay matud pa nahadlok na siya.
Si PO1 Jamna Marie Pilapil, Women’s and Children Protection Desk officer sa Marigondon Police Station, nagkanayon nga ang ginikanan sa biktima nangayo na og referral letter alang sa pagpahigayon og psychological examination niini.
Sa interbyu sa radio station DyHP, ang anak sa maestro mibutyag nga naningkamot sila nga ma-settle ang problema.
“As much as possible makig-settle mi kay naproblema na gyud si mama labi na pressure pud sa eskwelahan,” matud niya.
Siya midugang nga ang iyang amahan bag-uhay lang ni-resign sa eskwelahan. (BANAT NEWS)