CEBU, Philippines - Wala na makamata pa ang usa ka construction worker nga natulog nga hubog human kini daw giihaw tungod sa pagdunggab sa iyang lusonglusong ibabaw sa gikatulgang lantay diha sa Sitio Ylaya sa barangay Kawayan lungsod sa Dalaguete kagahapon sa alas 4:30 sa kaadlawon.
Ang biktima mao si Manuelito Debolido, 37, nagpuyo sa maong lugar samtang wala pay matumbok nga suspek ang kapolisan sanglit walay nakakita sa hitabo. Matud ni PO2 Godofredo Glipa, desk officer sa Dalaguete Police Station nga nahinabi sa Banat News nga sa sayong gabii pa uwahing nakit-ang buhi ang biktima nga nakig-inom sa balay sa silingang si Silverio Villacorta ug Ernswel Bahay.
Gikatahong nananghid kining mouna og pauli tungod kay nahubog na kini ug didto kini natulog sa lantay sa gawas sa balay sa uyoang si Felipe Debolido.
Apan matod pa samtang nahinanok nga natulog ang biktima tungod sa kahubog ug nianang pagkaadlawon nakit-an nalang kining nagbanaw ang dugo diha sa yuta sa ilawom sa lantay gikan sa lusonglusong sa biktima.
Gisuwayan pa unta pagdala sa tambalanan sa lungsod ni Debolido apan dihang nasutang patay na gyud kini gumikan sa kadaghan sa miawas nga dugo ug bugnaw na ang lawas wala nalang nila kini padayona og dala sa tambalanan.
Ang kapulisan padayon pang nipalawom sa ilang imbestigasyon aron matumbok ang motibo sa krimen ug pag-ila sa mga mamumuno niini. (/EIM)(BANAT NEWS)