CEBU, Philippines - Ipaubos sa heightened alert ang dakbayan sa Sugbo atol sa pag-abot unya sa imahe ni San Pedro Calungsod karung Nobiyembre 27 ning tuiga, ang imahen gikan sa Duaw-Nasud diin gilibot kini sa nagkadaiyang artsidiyosisis sa nasud gikan naabot sa Vatican.
Kini maoy usa sa gisabotan sa kapolisan ug militar atol sa ilang gihimong Command Conference kagahapong adlawa diha sa Police Regional Office (PRO-7).
Si Sr. Supt. Louie Oppus ang Deputy Regional Director for Operations mibutyag nga ilang gipangandaman ang ipahigayong National Thanksgiving kang Santo Pedro Calungsod.
Matud pa ni Oppus nga ilang gisuta kun ila bang kuhaan ang tanang kapolisan sa Central Visayas atol sa maong kalihukan. Gibanabanang moabot sa kapin usa ka milyon ang gipaabot nga motambong.
"Makigtambayayong unta nato ang katawhan atol sa solimneng kalihukan kay sa Roma gani atol sa pagsaulog sa kanonisasyon ni San Pedro Calungsod, dili man ingun nga daghan og polis pero tan-awa nagmalinawon ra, so kun makigtambayayong ta magmalinawon ra pud na," pasabot pa ni Oppus.
Atol unya sa Nobiyembre 30 iisa ngadto sa full alert status ang kapolisan. Gipaabot usab sa kapolisan ang rekomendasyon sa siyudad sa Sugbu kung ideklarar ba ang gun ban sa maong adlaw.
Ang Central Command misaad nga mopakatap og dul-an upat ka libong sundalo lakip na mga reservists nga motabang sa crowd control. ( /EIM) (BANAT NEWS)