CEBU, Philippines - Ang Department of Energy (DOE) uban sa pakig-alayon sa Department of Social Welfare and Development (DSWD) nang-apud apod og dul-an sa 33,000 ka Compact Flourescent Lamps (CFL) ngadto sa mga benepisyaryo sa Pantawid Pamilya Pilipino Program (4Ps) sa probinsya sa Sugbo, Bohol, Negros Oriental ug Siquijor agi og hulip sa incandescent bulbs nga kasagarang maoy gigamit sa maong mga benepisyaryo.
Ang maong panag-alayon sa duha ka ahensya sa goberno nagtumong sa pagpausbaw sa "Energy Conservation and Efficient Lighting" o pagdaginot sa kuryente isip usa sa mga tubag sa goberno sa problema bahin sa green house effect ug sa pagkonserbar sa enerhiya.
Matud pa ni Aileen P. Lariba, tigpamaba sa DSWD-7 nga ang maong pagpanghatag og CFL usa lamang ka aktibidad sa Philippine Energy Efficient Project (PEEP) nga proyekto sa DOE diin kun makaabot sa hustong kinutbanan sa gahum niini ang mga benepisyaryo makapangayo og bag-o nga CFL sulod sa lima ka tuig nga programa.
Dugang pa niya nga ang DOE miawhag sa mga benepisyaryo sa 4Ps sa paggamit og CFL aron makatabang kini sa pagkonserbar sa enerhiya nga molungtad sa 10,000 ka oras.
Pinaagi niini makadaginot og 80 porsyento nga konsumo sa elektrisidad ang benepisyaryo itandi sa incandescent bulbs nga kasagarang gigamit sa kabalayan sa tibuok nasud.
Si Amormina Hora, 37, ug usa ka inahan nga may lima ka mga anak nga nagpanuigon og 16 anyos, 15 , 12 , 5 ug 2 , nga nagpuyo sa Loon, Bohol kinsa usa sa mga benepisyaryo sa 4Ps nagpasalamat nga mikibra na ang ilang bayranan sa kuryente pinaagi sa paggamit og CFL.
Matud pa niya nga ang ilang suga nga bombilya puwerting dalia mapunder gumikan kay puwawan nila matag gabii tungod kay mahadlok ang iyang mga anak kun pagngon niya ang ilang suga magabii.
Gibutyag ni Lariba nga ang DSWD-7 nakapang-apud-apod og kapin sa 4,400 ka bombilya sa probinsya sa Sugbo, 10, 400 sa Bohol, 18,000 sa Negros Oriental, ug 134 sa Siquijor ug giuna gayud nila ang Poblacion ug mga bukirang barangay nga adunay koneksyon sa kuryente.( WC) (BANAT NEWS)