CEBU, Philippines - Giklaro sa bantogang magsisibya sa ABS-CBN Central Visayas ug dyAB nga si Leo Lastimosa nga dili ang banay’ng Gutierrez maoy iyang gikomentaryohan kabahin sa giingong ‘shortcutting’ aron lang sila makauna sa mga late registrants niadtong Okubre 31 diha sa Cebu City Comelec.
Si Lastimosa sa iyang pamahayag kagahapon sa TV Patrol Central Visayas miingon nga dili parehas sa uban wala siya magbugal-bugal sa pamilya sa celebrity nga si Anabelle Rama.
Si Rama ig-agaw ni Cebu City Mayor Michael Rama kandidato sa north district pagka-kongresista. Gisaway ni Anabelle ang pagkomento ni Lastimosa sa giingong ‘special treatment’ sa Comelec ngadto sa mga artista.
Apan giklaro sa mga Rama nga wala sila’y intensyong mo-shortcut apan ang Comelec officer nga si Marchel Sarno maoy mimando kanila nga mouna og sulod ug magparehistro aron malikayan ang kagubot sa mga tawong naglinya sa gawas.(BANAT NEWS)