CEBU, Philippines - Gihangop sa mga drayber sa PUJ ug mga pasahero nga mobiyahe ngadto sa Mactan Export Processing Zone (MEPZ) sa dakbayan sa Lapulapu ang kaanindot na agian sa United Nation Avenue paingon sa Marcelo Fernan Bridge sa dakbayan sa Mandaue.
Kini human trabahoa sa kagamhanan ang maong karsada busa dili malangan ang biyahe sa mga sakyanan ilabi na niadtong moadto sa Mactan Cebu International Airport (MCIA) sa Lapulapu.
Si Edwin Ermac nga maoy pangulo sa Traffic Enforcement Agency of Mandaue (TEAM) miingon nga nahibalik na sa normal ang dagan sa mga sakyanan sa maong lugar sa pagkakaron. Matud pa niya nga gidestino na niya sa laing mga lugar ang mga traffic enforcer nga maoy iyang gipabantay sa dagan sa trapiko sa maong lugar niadtong gitrabaho pa kini sa mga tawo sa obras publikas. Kasagaran sa gidestinohan sa maong mga traffic enforcer mao ang mga sementeryo sa dakbayan sa Mandaue aron mabantayan ang dagan sa mga sakyanan sa maong mga lugar.
Si Engineer Rachel Lumapas nga maoy division chief sa Department of Public Works and Highways (DPWH) 7 nga nahinabi sa Banat News mibutyag nga ang umaabot nga mga dagkong kalihokan sa Mandaue ug Lapulapu maoy hinungdan nga gidali paghuman ang trabaho sa pag-ayo sa U.N. Avenue.
Si DPWH 7 Director Ador Canlas miingon nga ang maong proyekto nga gigastohan og P28.475 gitakda unta nga unya pa mahuman sa Marso sa sunod tuig, apan gumikan kay gimandaran niya pag-ayo ang kontraktor niini, dali ra kaayo natapos ang maong proyekto. Tungod niini gipahalipayan ni Gobernador Gwendolyn Garcia si Director Canlas tungod sa maong kalamposan nga nakasulbad sa suliran sa kalangan sa biyahe sa mga sakyanan paingon sa dakbayan sa Lapulapu.( WC) (BANAT NEWS)