CEBU, Philippines - Ang mga sakop sa “cast” sa “horror booth” sa dakbayan sa Mandaue ang gi-ungo atol sa pag-abli sa maong show niadtong Lunes sa buntag.
Si Macky Mendoza, usa sa mga talent sa “horror booth” miingon nga samtang nangandam sila sa luyo, adunay usa ka tigulang babaye nga kalit lang nga mitungha ug miingon nga mosulod siya aron kuhaon ang lungon.
Ang babaye nga nagsul-ob og puti nga senina, puti kuno kaayo ug dihang ila unta kining balibaran kalit lang kining nawagtang hinungdan nga misutoy sila’g dagan tungod sa ilang kahadlok.
“Karon pa gyod mi kakita sa maong babaye maong nahadlok mi,” si Mendoza miingon.
Siya midugang nga sa miaging tuig samtang mi-posing siya sulod sa lungon adunay batan-ong babaye nga misulod ug misud-ong sa lungon.
Apan sa paglingi niya niini kalit lang kining nahanaw ug mao na lay iyang nasayran pagkahuman sa ilang show nga ang tag-iya sa ilang hinulamang lungon usa ka batan-ong Koreana nga naghikog kansang lawas gi-“cremate”. Ang ‘horror booth” anaa mahimutang sa Mandaue City Cultural and Sports Complex ug adunay tulo ka mga chamber diin lain-lain ang makit-an ug masinati sa mosulod niini.
Kini gipasiugdahan sa Kaabag Mandaue, Inc. uban sa kagamhanan sa Mandaue pinaagi sa Council for the Protection of Children diin ang kita nga baynte pesos nga pulta i-gasto sa Christmas Party sa usa ka libong kabataan nga nagagikan sa labing kabus nga pamilya. Ang pasundayag nagsugod sa miaging Lunes ug molungtad sa Nobiyembre 4 nga buksan sa ala una sa hapon hangtod sa tungang gabii. (BANAT NEWS)