CEBU, Philippines - Nagusbat ang nawong sa usa ka lalaki human kini mabagnos sa karsada nga maoy hinungdan sa iyang kamatayon human masaghiri sa Ceres Bus ang iyang motorsiklo nga gisakyan didto sa barangay Poblacion, lungsod sa Carmen kagahapon pasado alas 3:00 sa kaadlawon.
Ang biktima nailhan nga si Jesse Ceniza, 27, molupyo sa Cogon East sa maong lungsod, samtang ang drayber sa Ceres bus mao si Ronald Antonio, 49, nga taga lungsod sa Tuburan.
Sa pakighinabi sa Banat News ni SPO2 Simplicio Gibo, sa Carmen Police Station, nasuta nga ang biktima gikan pa sa amihanang bahin nga nagsakay sa iyang motorsiklong Honda nga adunay plakang YD-8834. Matud pa ni SPO2 Gibo nga sa pag-abot sa biktima sa maong lugar, kalit kini nga nasaghiran sa Ceres nga iyang gikasugat sa maong higayon
Nalagpot ang biktima gikan sa iyang motorsiklo ug sa pagtugpa niini sa sementadong karsada nabagnos ang iyang nawong gumikan sa kusog nga pagkapantok niini ug nagupok usab ang iyang helmet nga maoy hinungdan sa hinanali niining kamatayon.
Gisuwayan pa pagdala ngadto sa Danao District Hospital ang biktima diin didto ideklarar nga dead on arrival.
Nagtuo usab ang kapolisan nga kusog ang dagan sa motorsiklo sa biktima nga maoy hinungdan sa iyang pagkadisgrasya.
Ang drayber usab sa Ceres mitahan dayon ngadto sa kapolisan ug kasamtangan kini nga nagtingkagol sa prisohan samtang nagpaabot sa kasong ipasaka batok kaniya. (WC) (BANAT NEWS)