CEBU, Philippines - Temporaryong gilibkas ni Gobernador Gwendolyn Garcia ang closure order sa Kawasan Falls sa lungsod sa Badian human mapirmahi ang Memorandum of Agreement tali sa lokal nga kagamhanan sa Badian ug sa stakeholders alang sa conservation, enhancement and development sa nahisgutang falls.
Ang nahisgutang MOA ug Executive Order No.12 gipirmahan ni Garcia sa munisipyo sa Badian.
Mipirma usab sa nahisgutang MOA ang mga negosyanteng nag-operate sa maong falls nga nanag-iya sa Glicer’s Cottages, Anecita’s Picnic Huts, Duque’s Cottages ug ang pangulo sa Matutinao Farmers and Fishermen’s Association. Gilatid sa naasoy nga MOA nga ang mga gub-on sa maong mga negosyante ang kasamtangan nilang mga estraktura ug motukod lang pag-usab niini 20 metros gikan sa suba o sa falls (20-meter easement zone) ug ang desinyo aprubado sa kagamhanan sa lalawigan.
Gawas sa temporaryong paglibkas sa closure order gikatakdang motukod ang lalawigan og mga native picnic huts o sheds pinaagi sa build now pay later scheme, paghimo og landscape ug pagpanindot sa lugar pinaagi sa pagpananom og native ug ornamental nga mga tanom ug kahoy ug pagpatuman og hustong pagpanghipos sa mga basura.
Kinahanglan usab nga higpitan sa lungsod ang pagpatuman sa mga balaod ilabi na sa proteksyon sa kalikopan.
Mapasalamaton si Badian Mayor Robburt Librando sa maong kalamboan diin ang Department of Tourism mopaubos sa 80 ka local tour guides sa Badian sa usa ka seminar alang sa tukma nilang pagabuhaton panahon sa pagbisita pagbalik sa mga turista. Gipaabot nga daghang mga lokal ug langyaw'ng turista ang subling modugok sa Kawasan tungod niini.( EIM) (BANAT NEWS)