CEBU, Philippines - Wala na i-renew sa konseho sa siyudad sa Sugbo ang kontrata ni kanhi Konsehal Edwin Jagmoc isip consultant sa Department of Public Services (DPS) gumikan kay matud pa, wala kini maka-submit dayon sa iyang aplikasyon sa tukmang panahon.
Apan alang kang Jagmoc gituohan niya nga usa ka pamolitika ang gibuhat sa konseho apan gidawat gihapon niya ang iyang kapakyasan. Nasayran nga magpapili pagbalik si Jagmoc pagka-konsehal sa umaabot nga piniliay ubos sa Team Rama.
Matud pa ni Jagmoc nga mayoridad sa mga sakop sa konseho kaalyado sa Bando Osmeña Pundok Kauswagan (BOPK) busa dili na lang siya mahibulong ug makugang sa ilang desisyon.
Samtang si Konsehal Edgardo Labella kinsa kauban ni Jagmoc sa Team Rama misaysay nga maayo ang performance ni Jagmoc sa DPS busa angayan lang nga i-renew ang kontrata niini.
Apan wala’y mahimo si Labella sanglit minos ang gidaghanon sa mga konsehal nga kaalyado sa Team Rama ug gilupig sila sa estokada sa konseho kalabot sa maong isyu.
Si Labella maoy runningmate ni Mayor Michael Rama sa umaabot nga bugnong lugaynon sa 2013. Nasayran nga gihimong consultant si Jagmoc sa administrasyon ni Rama gumikan kay nasuheto kini sa pagpangalagad sa DPS samtang nagserbisyo siya isip konsehal sa siyudad sa Sugbo. (WC) (BANAT NEWS)