CEBU, Philippines - Buot ni Police Regional Office (PRO)-7 director Marcelo Garbo nga marelibohan ang mga pulis nga giingong nalambigit sa ilegal nga sugal kung mapamatud-an human sa validation sa Regional Intelligence Division.
Si Garbo midugang nga dili na kinahanglan ang imbestigasyon sanglit magkinahanglan kini og ibedinsiya.
“Relieve na kaagad if malaman natin na involved sila upon validation through our intelligence operatives,” matud ni Garbo.
Si Garbo mipasigarbo sa Cebu Provincial Police Office human niya makita ang accomplishment report niini nga nagpakita nga gihingusgan nila ang kampanya batok sa tanan matang sa ilegal nga duwa.
“We will go after all illegal gamblers until there is non-existence of illegal gambling in the area,” matud niya.
Sa iyang bahin, si Sr. Supt. Patrocinio Comendador, director sa CPPO, mibutyag nga igo lang sila mituman sa kamanduan sa ilang labaw ug kini ilang ipadayon sanglit kaayohan man kini sa tanan.
Si Comendador mibutyag nga ang tanang hepe sa kalungsuran kinahanglan gyud nga motuman sa maong kamanduan kay kung dili aduna kini silot nga nagpaabot kanila.
“I gave them 48 hours from the receipt of the memo to explain why they failed to conduct an operation,” matud ni Comendador bahin sa mga hepe nga walay accomplishment report batok sa ilegal nga sugal.
Sa 50 ka hepe giingong 26 lang ang nakasumitir og accomplishment report niadtong Martes.
Ang mga police stations nga wala makasumitir mao ang Naga City, San Fernando, Sibonga, Ronda, Alcantara, Alegria, Malabuyoc, Ginatilan, Samboan, Santander, Oslob, Boljoon, Alcoy, Catmon, Sogod, San Francisco, Tudela, Sta. Fe, Madridejos, Bantayan, Daanbantayan, Asturias, Aloguinsan, ug Tuburan.
Kasong simple neglect of duty o grave neglect of duty nga adunay silot nga 15 hangtod sa 30 ka adlaw nga suspension ang ipahamtang sa dili makahatag og balidong eksplinasyon. (BANAT NEWS)