CEBU, Philippines — Ipadayon ang road clearing sa kagamhanan sa Dakbayan sa Mandaue human ang Department of Interior and Local Government (DILG) nakadawat og kamandoan gikan sa ilang ulohan nga buhatan nga ipadayon ang ilang una nang nahimo nga paghawan sa kadalanan.
Matud ni John Joan Mende, city director sa DILG nga kinahanglang isustiner ang paghawan sa kadalanan gikan sa mga illegal parking ug illegal structures sa sidewalk human aduna gihapoy mga tawo ang badlongon diha sa kadalanan.
Si Mende nagkanayon nga ang road clearing magdisiplina kini sa mga tawo sa dili paggamit sa dalan sa dili husto nga pamaagi.
Sa iyang bahin, si Mayor Jonas Cortes nagkanayon nga ang Dakbayan sa Mandaue hugot nga nisuporta sa road clearing.
Matud ni Cortes nga nisuporta sila sa programa sa national agency ug ani aduna sila’y gihimo nga barangay road clearing.
Gibutyag ni Cortes nga ubay-ubay pa ang dapit sa siyudad nga kinahanglan sa road clearing ug nagkinahanglan usab kini og koordinasyon dili lang sa mga line agencies apan apil na usab sa mga barangay official. (BANAT NEWS)