CEBU, Philippines - Pwerteng malasa sa usa ka esnatser human wala siya lung-i og gukod sa babayeng iyang gibiktima ug nakulatahan na hinuon kini sa mga estambay sa Barangay Sto. Niño, Cebu City.
Ang pagpanglabni nahitabo sud sa usa ka jeep pasaheroan diha sa eskina Osmeña Boulevard ug Balintawak Street apan nadakpan ang suspek nga si Gerard Casa, 32, taga Sitio Laray, Carreta, Cebu City, diha sa residential area sa maong barangay.
Usa ka Cheska Diaz, 19, tinun-an sa kurso nga nursing sa usa ka unibersidad sa dakbayan maoy iyang gilabnihan og bag. Diha pa lang sa sud sa jeep misukol na si Diaz ug wala gihatag iyang bag.
Nilampos ang suspek ug nakadagan apan gigukod kini sa biktima hangtud nga naagi sa pundok sa mga estambay nga daling miresponde ug mitabang pagkulata sa suspek.
Swerte gihapon si Casa tungod kay naagian kini sa nagpatrolyang sila si Police Officer 2 Nicasio Undalok nga maoy mipakalma sa mga tawo. Ang suspek nakuhaan og usa ka kalibre .38 rebolber ug ilegal nga drugas nga may upat ka bala ug gitanggong na kini karon sa Waterfront Police Station. (BANAT NEWS)