CEBU, Philippines - Patay ang duha ka tawo nga naghikog sa managlahing dapit sa Sugbo.
Usa ka registered nurse ang napalgang nagbitay na sa pisi nga gihikot sa iyang liog didto sa Barangay Esperanza, lungsod sa Poro, Isla sa Camotes.
Ang naghikog naila nga si Jandy Rey Arcipe, 26, molupyo sa nahisgotang lugar.
Gidala unta si Arcipe sa Ricardo Maningo Memorial Hospital sa lungsod sa San Francisco apan gideklarar kini nga patay na’ng daan sa iyang pag-abot, matud ni Dr. Amina Kay Go.
Samtang patay na usab nga napalgan sa iyang anak ang usa ka ginang nga nagbitay sa ilang kusina didto sa Barangay Perelos, dakbayan sa Carcar.
Ang giingong naghikog naila nga si Janeth Lañas, 41, nga napalgan usab nga nagbitay nga may higot gihapon nga pisi sa iyang liog. Patay na kini pag-abot sa Carcar District Hopital.
Ang kapolisan miingon nga sa wala pa mapalging patay si Lañas dunay tawo nga miadto sa ilang balay ug gituohan nga dunay gisulti nga nakapahasol sa ginang.
Matud pa sa kapolisan nga wa masayod ang bana kung unsay nakahasol sa asawa. (BANAT NEWS)