CEBU, Philippines - Si Talisay City Mayor Johny V. De Los Reyes ug Dr. Paulus Mariae Cañete gipasakaan kagahapon og kaso’ng civil ni Richel Bacaltos, officer-in-charge (OIC) ug acting president sa Talisay City State College.
Matud ni Bacaltos sa iyang petisyon nga ilegal ang pagtudlo ni Mayor De Los Reyes kang Cañete isip hulip kaniya pagka OIC ug acting president sa TCC tungod kay pinasikad ra kini sa usa ka executive order ug dili gikan sa board resolution sa mga sakop sa Board of Trustees sa maong eskuylahan.
Sumala pa ni Bacaltos ang pag-appoint kang Cañete nakamugna og kalibog sa mga tawo kung kinsa nilang duha ni Cañete ang tinuod nga president sa TCC.
Si Bacaltos gikuyogan sa iyang abogado nga si Atty. Joseph Baduel ug mihangyo sa korte nga mo-isyu kini og Temporary Restraining Order (TRO) aron pugngan ang paglingkod ni Cañete.
Gawas sa TRO, mihangyo usab si Bacaltos nga mopagawas ang korte og Writ of Mandatory Injunction nga palingkuron siya pagbalik sa iyang posisyon.
Niadtong Pebrero 3, 2014 si Mayor De Los Reyes miisyu og kamandoan nga nagtudlo kang Cañete nga bag-ong officer-in-charge-president sa TCC hulip kang Bacaltos. Apan si Bacaltos nagkanayon nga ilegal kini base sa City Ordinance No. 2008-11 nga giaprubahan ug gipatuman niadtong Disyembre 10, 2008.
Ang maong ordinansa nagkanayon nga ang Board of Trustees ra sa TCC ang adunay katungod nga motudlo og OIC sa tunghaan.
Si Bacaltos gitudlo nga OIC president sa TCC kaniadtong Hunyo 5, 2013 base sa board resolution.
Ang Board of Trustees gilangkoban sa city mayor isip chairman; college president isip vice chairman; congressman sa 1st District; SP chairman sa Committee on Appropriation, Budget Management and Ways and Means; CHED Representative; presidente sa Cebu Technological University; presidente sa Cebu Normal University; representante gikan sa Talisay City Chamber of Commerce; DepEd Talisay City Superintendent; board secretary ug ang City Treasurer.
Tungod sa maong kalibog, si Bacaltos nangayo og actual damages nga P43,000; P50,000 nga moral damages ug P100,000 nga attorney’s fees. (BANAT NEWS)