CEBU, Philippines - Usa ka polis ang gidakop sa iyang mga kauban human nga positibo kini nga giila sa usa ka babaye nga maoy mitulis kaniya.
Si PO2 Ronilo Manuel, sakop sa City Public Safety Battalion sa Cebu City Police Office (CCPO) ug molupyo sa Barangay Duljo-Fatima, dakbayan sa Sugbo gidakop uban sa giingong bata-bata niini nga si Benito Andres Abiar.
Ang biktima sa pagpanulis nga mitudlo ni PO2 Manuel mao si Rochel Cueco, 22, molupyo sa Barangay Bakilid, dakbayan sa Mandaue.
Base sa imbestigasyon sa kapolisan, ang biktima nagbarog kuyog sa iyang mga higala sa dalan R. R. Landon, dakbayan sa Sugbo pasado alas-3 sa miaging kaadlawon.
Matud pa nga kalit nga niabot ang duha ka lalaki nga nagsakay og motor ug mihunong sa ilang tungod, dayon usa kanila mition og armas sa biktima ug mideklarar nga hold up.
Nakuha sa duha ka tulisan ang bag sa biktima nga may sulod nga cellphone ug kwarta nga mobalor og P4 mil lakip na usab ang iyang mga importanteng papeles.
Dihang gisubay ang rogues gallery sa Fuente Police Station, ang biktima mitumbok kang Abiar nga usa sa mga mitulis kaniya. Tungod kay ang kapolisan nasayod man nga batabata ni PO2 Manuel si Abiar, gipakita sa mga polis ang biktima sa Facebook nga adunay hulagway sa maong polis ug positibo niya nga giila si PO2 Manuel nga apil sa mitulis kaniya.
Ang ubang polis nga ka-batch ni PO2 Manuel diha sa maong police station mitawag niini sa pag-report sa Cebu City Police Station-2 tungod kay adunay reklamo kanilang duha ug sa iyang bata-bata aron malimpyohan ang iyang pangalan.
Nagsul-ob pa sa iyang uniporme sa polis si PO2 Manuel dihang miabot sa Police Station 2 ug didto gitumbok silang duha si Abiar sa biktima hinungdan si Chief Insp. David Señor, ang hepe sa maong police station, mimando dayon nga dakpon si PO2 Manuel ug ang kauban niyang si Abiar.
Si PO2 Manuel ug Abiar kusganong mihimakak sa mga pasangil kanila sa biktima sa pagpanulis.
Matud ni Cebu City Police director Noli Romana nga taud-taod nang nag-AWOL (absent without official leave) si PO2 Manuel ug gikatakda na gani nga pasakaan og kaso nga administratiba. (BANAT NEWS)