CEBU, Philippines - Dakong supak ang hepe sa City Intelligence Branch sa dakbayan sa Sugbo Chief Insp. Romeo Santander sa planong paglegalisar sa marijuana sa nasud.
Si Santander nga nahinabi sa mga tigbalita miingon nga base sa iyang kasinatian dili gyud siya mouyon nga legalisahon ang marijuana.
Matud pa nga dunay mga sektor ilabi na sa medisina ang nangusog nga himuong legal ang marijuana dinhi sa nasud tungod sa medicinal value niini ilabi na sa mga dunay sakit nga kinahanglang pakalmahon.
“Based on experience especially katong chop chop case sa Minglanilla di gyud ko uyon,†sumala pa ni Santander.
Si Santander pa maoy hepe sa Minglanilla police station niadtong tuig 2008 dihang nahitabo ang gitawag nga “chop-chop ladies†diin duha ka babaye ang gitagod-tagod ug gisud sa mga sako ug gilabay sa mga bukirong bahin sa maong lungsod.
Sumala ni Santander nga gipatay sa usa ka lalaki inabagan sa iyang kapuyo ug amigo ang pangasaw-onon sa iyang igsuon ug ang katabang niini pinaagi sa pagtagod-tagod kanila. Ang tulo ka mga suspek ang naaresto ug kasamtangan karong nabilanggo sa Talisay City Jail. Matud pa ni Santander ang duha kanila nga pulos mga lalaki pulos sabog sa marijuana niadtong tungora. Matud ni Santander nga kun ma-legalized ang marijuana, maproblema gyud ang kapolisan tungod kay mosaka na ang mga krimen nga may kalambigitan sa paghithit og marijuana. “The more krimen nga mahitabo kung ma-legalized na ang marijuana,†dugang ni Santander.
Apan miingon si Santander nga sa mountain barangays pa lang sa dakbayan sa Sugbo ang daghang tiggamitan niini ug dili sa kinapusoran sa dakbayan.
Apan nabalaka si Santander nga kun malegalisar kini walay mahimo ang kapolisan kun dili ang pagpatuman niini.
“We will follow whatever the amendments, unsay mo-come up atong sundon, but I’m against it,†dugang ni Santander.
Apan miangkon ang opisyal nga makasugat unya sila og kalisdanan sa pagpatuman sa maong lakang tungod kay sa kapolisan ra gihapon mohan-ok ang mga buhatonon.
“Kung ma-legalize na, how to control ari gihapon na mapasa,†sumala pa ni Santander. Miingon si Santander nga ang nahitabo sa Minglanilla usa ka leksyon nganong dili angay legalisahon ang paggamit sa marijuana. (BANAT NEWS)