CEBU, Philippines - Tungod sa alakansi, gipamusil patay sa usa ka negosyante ang iyang asawa ug duha ka anak una siya maghikog sulod sa ilang sakyanan didto sa San Isidro Road, barangay Dampas, syudad sa Tagbilaran, Bohol, kagahapon sa alas 11:00 sa buntag.
Ang kapolisan sa Tagbilaran City Police Office miila sa negosyante nga mao si James Co, 46, tag-iya sa usa ka lending firm sa Tacloban city.
Una niyang gipatay ang iyang asawa nga si Cindy Bonanico Co, 37, dayon ang iyang duha ka anak nga sila si James Martin Co, 10, ug James Andre Co, 5 pulos nagpuyo sa Esteban Estaca Street, corner Peñaflor Street, barangay Booy sa Tagbilaran.
Nasuta nga gipasakay ni James ang iyang asawa ug duha ka anak sa ilang sakyanan nga Nissan Sentra Sedan, nga may plate number WME 194 ug pag-abot didto sa San Isidro Road, barangay Dampas, syudad sa Tagbilaran, gipahunong sa suspek ang iyang sakyanan.
Dayon mikuha sa iyang 9 MM pistol ug gipamusil sa ulo ang iyang asawa ug duha ka anak.
Si PO3 Joemar Miculob, desk officer sa kapolisan sa Tagbilaran mibutyag sa Banat News nga usa ka saksi sa duol sa nahitaboan nga may 17 anyos ang edad, mitug-an kanila nga nakadungog siya og tulo ka buto sa armas de fuego. Iya kining giadto ug maoy iyang nakita si James nga nagbarug duol sa ilang sakyanan.
Dayon mikuha kini og duha ka letrong gasoline ug gibubo sa sakyanan, ug misulod siya niini ug gidusliban.
Unya samtang nagdilaab na ang kayo sa sakyanan, nabati sa saksi ang usa ka buto kay nagpusil sa iyang kaugalingon ang maong negosyante, hinungdan nga nagdungan sila og kaugdaw uban sa ilang sakyanan.
Miingon si Miculob nga nagbilin na daan og suicide note ang nahisgutang negosyante sa iyang balay ug sa iyang buhatan sa lending firm sa Tagbilaran. Gihisgutan niini ang bahin sa iyang pagkaalakansi sa negosyo ug gusto na kining magpakamatay uban ang iyang pamilya. Napunitan pa sa kapolisan ang 9 mm pistol nga gigamit sa maong negosyante sa maong krimin. (BANAT NEWS)