CEBU, Philippines - Gipanghimakak ni Lapu-Lapu City Mayor Paz Radaza nga nagpa-solicit siya sa mga kompaniya sud sa Philippine Economic Zone Authority o PEZA aron idugang sa mga calamity assistance didto sa Bohol, Leyte ug sa Mindanao.
Kini ang hugot nga pamahayag ni Radaza kabahin sa mga report nga ang city government sa Lapu-Lapu nag-solicit sa mga locators sa PEZA sa milabay’ng tuig. Ang alegasyon nga giingong tag 200 pesos matag empleyado ang deduction sa ilang sweldo aron itabang sa mga biktima sa kalamidad sa siyudad.
Si Radaza miklaro nga ang balor P1.5 milyon nga ilang gihatag sa Bohol ug P1.5 milyon sa Daanbantayan gikan sa disaster fund sa siyudad ug walay labot ang mga empleyado sa gobiyerno o pribadong sektor.
Gumikan niini, iyang ipasusi ni City Attorney Yuri Binluan ang kalabot sa maong alegasyon ug pakigkitaan si PEZA Administrator Sansaluna Pinagayao aron sa pagpahunong sa maong kompaniya nga mihimo niini. (BANAT NEWS)