CEBU, Philippines - Gipasalig sa hepe sa kapolisan sa syudad sa Talisay nga iyang ipaimbestigar ang giingong usa ka polis nga nangulata og menor de edad nga molupyo sa Deca Homes sa Talisay City niadtong nakalabay nga adlaw.
Sumala pa ni Talisay City Police Office Chief, Supt. Resty Santos nga iyang gisangonan si PO2 Edwin Campomanes nga maoy moimbestigar sa nahisgutang insidente.
Si Santos nagkanayon nga nag-unang susihon sa imbestigador sa Talisay City Police Office mao ang pag-ila sa polis nga nangulata duol sa Deca Homes sa Talisay City.
Nasayran nga usa ka 16 anyos nga bayong-bayong nga lumad nga taga barangay Poblacion sa syudad sa Talisay ang giingong gisumbag, gituok ug gikulata sa usa ka polis nga nagpuyo sa Deca Homes ug nagpakitabang sa kapolisan aron kini mailhan sa labing daling panahon. Giasoy sa biktima nga niadtong Sabado samtang luwan siya sa sakyanan nga kargado sa balas, aksidenteng naigo sa giitsa niyang bato ang usa ka polis nga gikatahong nagpuyo sa Deca Homes sa maong siyudad.
Sumala pa niya nga mibawos ang maong polis sa paglabay og bato kaniya tungod sa kalagot sa naulahi.
Wala pa makontinto ang nahisgutang polis giduol siya ug kalit nga gituok ang iyang liog ug gisumbag ang iyang dagway busa nangalagom kini sa kabun-og.
Human makorasyoni, namatud-an ni Dr. Ceasar Bautista sa Talisay District Hospital nga may mga bun-og ang liog sa biktima nga timailhan nga gituok siyang tinuod sa polis.
Si Santos nagkanayon nga ilhon sa iyang buhatan ang tanang mga polis nga nagpuyo sa maong subdivision o kaha magkanunayan sa Deca Homes sa Talisay City aron ikatudlo sa biktima kun si kinsa ang nangulata kaniya
Sa higayon nga matumbok ang maong polis, mihagit si Santos nga ipakiha kini og child abuse base sa Republic Act 7610 ug ingon man kasong administratiba tungod sa pagpangdagmal sa bata.
Dugang pa ni Santos nga human sa imbestigasyon ang Women's and Children Desk na sa Talisay City Police Office ang mo-follow up ug mopalig-on sa mao unya nga kaso. (BANAT NEWS)