CEBU, Philippines - Patay ang usa ka sidewalk vendor nga gipusil sa upat ka wala hiilhing lalaki nga nagsakay og motorsiklo didto sa dalan Ompad, sa barangay Poblacion sa dakbayan sa Lapu-Lapu ala 1:00 pasado sa miaging kaadlawon.
Ang biktima mao si Alin Godinez, 40 , minyo ug vendor sa pagpangluto og noodles sa maong dapit.
Si PO3 Winston Ybanez sa homicide section sa kapolisan sa Lapu-Lapu Police Station nga nahinabi sa Banat News miingon nga nag-init og tubig ang biktima alang sa noodles nga sinagolan og itlog.
Dihang sa kalit lamang miabot ang usa ka motorsiklo nga gisakyan sa upat ka tawo kinsa pulos nagsul-ob og mga helmet. Dugang pa ni PO3 Ybanez nga nanaug ang usa sa upat busa nagtuo ang biktima nga iya kining kustomer, apan kalit siyang gipusil niini sa makadaghang higayon.
Samdan ang biktima sa ulo ug uban pang bahin sa lawas nga maoy hinungdan sa pagkatumba niini ug namatay.
Ang mga kriminal dali kaayong mieskapo pahilayo sa maong dapit.
Gidali sa pagsakwat sa asawa ang iyang bana nga nahagba sa yuta ug gihatud ngadto sa Lapu-Lapu City Hospital apan gideklarar kini sa mga doktor nga dead on arrival. Matud pa ni PO3 Ybanez nga sa crime scene ilang napunitan ang upat ka mga kabhang sa bala sa kalibre .45 nga pistola ug duha usab ka lumping na nga bala nga gituohan maoy gigamit sa mipatay sa biktima.
Dugang pa ni PO3 Ybanez nga ang asawa sa biktima nga maoy kauban sa pagpamaligya og noodles niini mibutyag nga walay gikaaway ang biktima sa maong dapit apan hinuon giila kining bugalbugalon sa mga seksing babaye nga maglakaw nga molabay sa iyang nahimutangan.
Kini pinaagi sa pagpanitsit ug pagpanaghoy dayon mokatawa iniglingi na sa iyang sitsitan. Padayong gipangita karon sa kapolisan ang mga kriminal. (BANAT NEWS)