CEBU, Philippines - Patay ang usa ka lalaki nga nabanggaan sa van atol sa iyang paglabang sa dalan sa Barangay Pajo sa lungsod sa Daanbantayan sa miaging adlaw.
Ang biktima naila nga si Senen Rosales Lahoylahoy, 56, taga sitio Camotes, Barangay Tapilon sa maong lungsod.
Gitanggong karon ang suspetsado nga si Teodoro Casinello, 54, taga sitio Taytayan sa barangay Maya sa samang lungsod.
Base sa imbestigasyon sa kapolisan milabang sa karsada ang biktima ug mao say pag-agi sa van sa suspek padung sa Bogo hinungdan nga nadasmagan kini.
Daling gitabang sa suspek ug sa niresponding tanod ngadto sa Daanbantayan District Hospital apan nakabsan kini sa kinabuhi gumikan sa liki sa ulo.
Ang suspetsado gikatakdang pasakaan og kasong reckless imprudence resulting to homicide. (BANAT NEWS)