CEBU, Philippines - Ang gidaghanon sa mga job orders maoy usa karon sa mga isyu sa dakbayan sa Talisay tungod kay ang siyudad naggahin og milyones nga kwarta matag buwan alang sa ilang sweldohan. Kahinumduman nga mikabat sa kapin sa 2,000 ka mga JO sa siyudad ang gilaslasan ni Talisay City Administrator John Yre De los Reyes ug nahimo nalang karong 1,400 karon.
Apan ubay-ubay sa mga natangtang ang nasagmuyo sa mga opisyal sa Talisay human sila balibari nga maka-renew sa ilang kontrata aron ang ubang aplikante mahatagan usab kini og higayon nga makatrabaho.
Aron wala na unya’y mabalibaran nga mga aplikante ang kagamhanan sa siyudad nagplano kabahin sa “Green Valley Program†diin palamboon niini ang agrikultura sa Talisay.
Si Mayor Johnny De los Reyes mibutyag kini kabahin sa pagpananom og mga utanon diha sa mga bakanteng luna sa siyudad. Ang pag-ugmad sa luna ug pagpananom isangon kini ngadto sa mga JO ug giingong gawas sa ilang madawat nga sweldo ang mga JO nga miugmad niini makadawat usab og bahin sa abot sa ilang giugmad nga mga tanom.
Matud sa mayor nga napanglantawan niyang maabunda na unya sa abot sa mga utanon ang siyudad ug ang ubang mga negosyante og utanon gikan sa laing mga lugar anha na unya mangompra sa Talisay ug makadugang usab kini sa abot sa siyudad. Gibutyag sa mayor nga duna siya’y nabantayang mga JO nga walay gibuhat.
Plano sa mayor nga hangyoon ang mga pribadong mga bakanteng luna nga wala gamita nga mogama og Memorandum of Agreement tali sa siyudad alang sa nahisgutang proyekto.
Ang Department of Agriculture giingong maoy mohatag og mga binhi sa mga utanon nga ipananom unya. (BANAT NEWS)