CEBU, Philippines - Gipahibawo sa DOLE-7 nga andam na ang ilang Emergency Employment Program alang sa mga nabiktima sa bagyong Yolanda didto sa amihanang bahin sa probinsiya sa Sugbo. Si Emmanuel Ferrer, tigpamaba sa DOLE-7 nagkanayon nga ang katuyuan sa maong programa mao ang pagpatrabaho sa mga apektadong pamilya sa clearing operations sa 13 ka mga lungsod sa Northern Cebu.
Buot sa DOLE-7 nga ang mismong tagsa-tagsa ka mga pamilya maoy mangunay sa paglimpyo sa ilang mga tugkaran ug bayran sila niini.
Nakapalit na og gamit alang sa clearing operation ang ilang buhatan nga mao unya’y gamiton sa mga biktima sa bagyo sa pagpanglimpyo sa ilang kaugalingong lugar.
Nasayran nga nawagtangan og panginabuhian ang mga nabiktima sa bagyo ug tungod sa nahisgutang programa matabangan sila sa ilang panginabuhian. (BANAT NEWS)