CEBU, Philippines - Dili makatuo ang vice chairman sa Crusade Against Violence kon CAV nga si Thelma Chiong sa pagkalambigit sa iyang igsoon sa kontrobersya sa pork barrel scam.
Ang iyang igsuon nga si Chyrel Jimenea giingong gikuhang consultant sa gitumbok nga mastermind sa P10 bilyones nga pork barrel scam nga si Janet Lim Napoles kinsa kasamtangan na karong gibilanggo sa Laguna tungod sa kasong serious illegal detention tungod sa pagkidnap sa whistleblower nga si Benhur Luy. Si Chiong mikompirmar nga ang iyang igsoon gikuha ni Napoles isip consultant sa kompanya apan karon lang kining tuiga.
Si Jimenea matud pa gitumbok sa tulo ka testigos nga nalambigit sa maong pagpangawat sa salapi sa katawhan.Hinuon si Chiong nagkanayon nga atubangon sa iyang igsuon ang mga pasangil batok kaniya.
Ning bag-ohay lang pito na ka mga senador ug kapin sa 20 ka mga kongresista ang giingong mga nalambigit sa maong pagpangawat. (BANAT NEWS)