CEBU, Philippines - Usa sa mga residente sa sitio Sombrea, barangay Lawaan I, dakbayan sa Talisay mireklamo sa konseho niadtong Martes sa buntag tungod kay kanunay nga gibahaan ang ilang lugar.
Si Isabelito Lapinid, mibutyag atubangan sa mga konsehal nga matag uwan kanunay silang mag-ubog sa baha nga mosanap sa tanang mga kabalayan sa ilang lugar.
Gibutyag ni Lapinid nga ang milabay’ng administrasyon mipasemento sa karsada sa ilang lugar apan tungod kay walay imbornal, nagpabilin ang maong kahimtang sa pagkakaron nga mobanaw ang tubig sa uwan lukop sa tanang kabalayan.
Matud niya nga gikinahanglan niini ang drainage system aron dunay maagian ang tubig ug dili mobanaw sa karsada.
Nanghinaot si Lapinid nga kahatagan og dakong pagtagad sa kagamhanan sa siyudad ang ilang kahimtang. Si Vice Mayor Romeo Villarante mipasabot kang Lapinid nga ang ilang problema nasinati usab didto sa barangay Poblacion, Cansojong, Biasong ug Pooc.
Matud sa bise mayor nga ang bag-ong administrasyon karon nangita og paagi nga masulbad ang problema sa pagbaha sa Talisay.
Mabantayan nga matag bunok sa uwan bahaan gayud ang mga patag nga lugar sa dakbayan.
Hinuon miingon siya nga may mga lugar nga dali ra hubsan sa tubig samtang ang uban dugay usab kaayo sama sa sitio Machacao ug Garden sa Poblacion boundary sa Cansojong.
Gani sa Cansojong molanat pa og mga semana una pa mohubas ang baha tungod kay ang tubig walay kaagian.
Ang mga residente sa maong lugar miingon nga usa sa ilang mga silingan nga namatay tungod sa infection sa iyang samad sa tiil sa pagpunay og humol sa tubig sa baha. Gawas pa niini ang mga residente sa mga bahaanan nga lugar nabalaka usab sa dengue ug uban pang mga sakit-sakit. (BANAT NEWS)