CEBU, Philippines - Nasikop sa kapolisan ang duha ka tawo nga suspetsado sa mga tulis ug pagpanglungkab sa dakbayan sa Mandaue didto sa eskina sa Fine Tree street sa barangay Banilad sa maong dakbayan sa miaging kaadlawon.
Ang duha giingong nagsakay og motorsiklo nga walay plate number dihang nasigpatan sa mga mananakop.
Ang maong mga suspetsado mao sila si Ain Doughlas Decapio, 27, ulitawo, nga taga Upper Bacayan sa dakbayan sa Sugbo ug Edmar Lahoy-Lahoy, 20, ulitawo nga taga sitio Marang, barangay Talamban, dakbayan sa Sugbo.
Si PO1 Juani Libres sa kapolisan sa Presinto 4 sa Mandaue City Police Office (MCPO) nga nagbase sa barangay Casuntingan mibutyag sa Banat News nga nagsakay sa ilang patrol car sila si PO1 Oliver Gipanao ug PO1 Gerald Soquib samtang nagpatrolya sa maong lugar.
Kini tungod sa mga tulis ug pagpanglungkab nga gikataho sa maong dapit kansang mga suspetsado wala pa hiilhi, apan gitataw nila nga magsakay kini og motorsiklo.
Dugang pa niya nga samtang nagdagan ang ilang sakyanan, nasigpatan nila ang motorsiklo nga walay plate number nga giluwanan sa duha ka lalaki. Dali nila kining gigukod ug ilang naapsan sa eskina Fine Tree sa barangay Casuntingan.
Hinungdan nga ila kining gipahunong ug gipakanaug sa giluwanan nilang motorsiklo.
Gipangayoan kini nila ni PO1 Libres sa rehistro sa gidala niining sakyanan, ug lisensya usab sa nagdala niini, apan wala kini gikapakita.
Girikisa nila ni PO1 Gipanao ug PO1 Soquib ang lawas sa duha ka dinakpan ug ilang nakuha ang giluklok niining kutsilyo.
Nakuha usab nila ang gidala niining tagsa ka paketeng shabu.
Sa pagkakaron nagtingkagol na ang duha sa prisohan ug gitakda nga ipasaka ang kaso ngadto sa korte batok niini karong adlawa. (Romeo T. Limpangog/WC)
RAFI mitugyan sa programa ngadto sa mga batan-on
Ni Liezel Mabini Frasno
Sa pagtuo sa katakus sa pagdumala sa mga batan-on, ang Ramon Aboitiz Foundation Inc. (RAFI) mitunol sa iyang pagdumala niining Multi-city Youth exchange (MYX) and Young Minds on Xplore (YMX) nga mga programa ngadto sa gitawag nga Young Heroes for Cebu (YHC) sa usa ka kasabutan sa pagpinirmahay sa miaging Hulyo 10, 2013 didto sa Sinulog Hall sa Rizal Library and Museum, ning dakbayan sa Sugbo.
Ang YHC usa ka kapunongan sa mga batan-on nga gisakpan sa mga alumni sa ikatulong dagan sa YMX, usa ka matang sa programa nga mitumaw dinhi gikan sa Europe alang sa mga kabatan-onang Sugboanon nga giorganisar sa RAFI uban sa Vriendschapsband Haarlemmermeer–Cebu (VHC), ang syudad sa Kortrijk, ug dakbayan sa Sugbo.
Ang pagpirma sa kasabotan maoy usa sa labing dakong bahin sa panihapon nga giandam alang sa mga delegado sa ikaduhang hugna sa MYX ang pang-alkontra nga immersion program sa Sugbo alang sa mga batan-on nga Dutch ug Belgian nga dumalahon sa YHC ning tuiga.
Ang mga lider nga hamtong sa MYX 2 sama kang Nanda van Dijk and Kim Walgraeve nga nagrepresentar sa VHC ug ang siyudad sa Kortrijk, ang usa ug usa maoy mipirma isip mga saksi sa maong kasabotan.Si konsehal James Cuenco, Chair of the Committee on International Relations, mipirma usab isip saksi sa ngalan sa dakbayan sa Sugbo. (BANAT NEWS)