CEBU, Philippines - Duha ka tawo ang nangaangol human gipamusil sa duha ka armadong tulisan diha sa barangay Catmon Daan sa lungsod sa Catmon niadtong niaging alas 3:00 sa hapon.
Ang biktima nga naangol mao si Eleonor Boto, 27, ug ang drayber sa habalhabal nga ilang gisakyan nga si Florante Pontellas, 33, molupyo sa Tinabyunan, sa samang lungsod. Ang inahan ni Boto nga si Vilma ,56, maoy nagdala sa bag nga gisudlan sa kwartang ilang gi-withdraw gikan sa bangko nga balor P57 mil.Sumala pa nga padung na unta ang tulo pauli sa barangay Sto. Niño- Flores sa maong lungsod apan pag-abot sa hilit nga dapit gitulis sila sa duha.
Matud ni PO1 Ralph Bracero sa Catmon Police dihang nahinabi sa Banat News human makuha ang bag, mga alahas ug duha ka cellphone gipusil sa tulisan ang drayber apan ang bala milapos sa tuong abaga sa anak ni Vilma. Ang duha gihatud sa Juan Dosado Memorial Hospital sa lungsod sa Sogod. (BANAT NEWS)