CEBU, Philippines - Gisikop sa kapolisan ang usa ka hubog kinsa misuway pagpusil sa usa ka babaye didto sa Brgy. Alang-alang dakbayan sa Mandaue sa milabay’ng adlaw.
Ang suspetsado mao si Benjie Tipdas, 21, nga taga Brgy. Cubacub sa maong dakbayan ug nagtrabaho sa usa ka Security Agency samtang ang biktima mao si Flordeliz Crisologo, 53, ug nagpuyo sa UN Avenue Brgy. Alang-alang sa maong dakbayan.
Sa pasiunang imbestigasyon sa kapolisan, nasuta nga samtang busy ang biktima sa pag-atiman sa ilang bisita nga namista sa ilang balay niadtong tungora, kalit nga miabot ang suspek ug milanit sa iyang armas.
Dayon gitionan niya ang biktima apan dihang gikablit niya ang gatilyo niini, mikagar ug wala makabuto hinungdan nga misiyagit si Crisologo sa pagpangayo og tabang sa ilang mga silingan.
Ang anak sa biktima nga nakabantay sa maong hitabo milihok dayon sa pag-ilog sa armas sa suspetsado ug gitabangan sa iyang mga silingan og layog ang suspek hangtud nga naabtan kini sa kapolisan ug gidakop dayon.
Matud ni PO2 David Omambac sa Mandaue City Police Office (MCPO) Station1 nga nasuta nila nga positibo sa liquor test ang suspek.
Nag-atubang sa kaso nga paglapas sa Comelec gun ban ang suspetsado ug nagkagulkol na sa prisohan. (BANAT NEWS)