CEBU, Philippines - Gisusi karon sa kapolisan ang nahitabong pinusilay sa mga armadong mga lalaki diha sa barangay Pulpogan sa lungsod sa Consolacion niadtong Domingo sa gabii.
Wala hinuoy nangaigo nga napagan sa maong sinukliay sa mga bala sa mga armadong lalaking pulos nagsakay og motorsiklo.
Apan gibutyag ni Chief Insp. Marlon Gumabao, hepe sa Consolacion Police dihang nahinabi sa Banat News walay nakaila sa mga lalaki ug gani bisan ang mga residente wala usab mosumbong sa kapolisan bahin sa hitabo.
Sa pagsusi sa kapolisan diha sa crime scene pito ka kabhang sa bala sa kalibre .45 ug laing lima ka kabhang sa bala sa kalibre .40 ug usa ka magazine nga dunay sulod nga tulo ka buhing bala ug laing usa ka buhing bala sa kalibre .40 ang ilang napunitan.
Matud pa ni Gumabao base sa ilang nakuhang impormasyon ang duha ka grupo pulos nagsakay og motorsiklo nga ang tagduha nila ka mga angkas maoy mga armado ug nakigsinukliay og bala.
Apan nakuha hinuon kung unsa nga mga motor ang gigamit nga mao ang Honda Wave kolor itom nga dunay plaka nga IR-6202 ug ang laing motor nga gisakyan sa pikas grupo Honda Wave gihapon nga kolor Silver Black dunay plaka nga OT-6055.
Si Gumabao nanawagan sa mga molupyo nga dunay dugang impormasyon kabahin sa mga responsable.
Anggulo sa ginadiling drugas ug personal nga bangi sa magkaribal nga grupo ang sentro sa nagpadayon karung imbestigasyon. (/EIM) (BANAT NEWS)