CEBU, Philippines - Gihangop sa konseho sa dakbayan sa Talisay ang bayanihong buhat sa usa ka 9-anyos nga batang babaye kinsa miluwas sa iyang usa ka tuig nga manghud gikan sa nasunog sa miaging semana sa sitio Hawod barangay Bulacao, sa maong dakbayan.
Niadtong Martes atol sa ilang regular session ang konseho sa Talisay mipalabang sa resolusyon nga gipangamahanan ni Vice Mayor Alan Bucao nga midayeg kang Rhea Tisoy.
Kahinumdoman nga ang balay sa mga Tisoy usa sa lima ka mga puloy-anan nga naugdaw atol sa sunog sa nahisgutang lugar.
Ang kandidato sa pagka-bokal sa unang distrito sa probinsiya nga si Yayoy Alcoseba mihatag og scholarship kang Rhea gikan sa elementarya hangtud nga kini mag-college.
Si Rhea kinsa grade three na karon sa Bulacao Elementary School magsugod na og pahimulos sa iyang scholarship sa South Western University, Basak Campus sa umaabot nga tingbukas sa klase sa Hunyo niining tuiga.
Apan ang motibo ni Alcoseba sa paghatag og scholarship ni Tisoy gikuwestion ni Bucao.
Nakapangutana si Bucao kun nganong karon pa mihatag og tabang si Alcoseba nga niadtong panahon nga gibahaan ang Talisay uban sa panahili sa yuta o landslide wala man mopatim-aw si Alcoseba. Hinuon ang Bise Mayor nanghinaot nga ang maong paghatag og tabang ni Alcoseba ipadayon kini hangtud nga mahuman ang eleksiyon.
Si Alcoseba sa iyang bahin nagkanayon nga nagpakita lang siya sa iyang kahinangop sa gipakitang kaisog sa bata hinungdan nga mihatag siya og tabang niini. (BANAT NEWS)