Sto. Niñ0 de Cebu: El Capitan General

CEBU, Philippines - Nakamatikod  kamo nga sa  wa pa  mobiya  si Sto. Niño  sa Basilica paingon  sa Solemn Procession, laing  imahe  ni Sto. Niño  ang  misud  sa simbahan?

Kining  maong  tradisyon dugay  na  nga gisunod  ug  gituman,  nga  daghan  kaayong  mga tawo  ang  wa  makasabot  unsa  kining  buhata. Ning  tuiga, lain na usab, suma  kang Padre Tito D. Soquiño, ang Executive Director sa Santo Niño de Cebu Augustinian Social Development Foundation, Inc.

“Ang Sto. Niño gikan sa Basilica , nga molibot  sa tibuok  siyudad  sa panahon  sa procession mao ang El Capitan General. Ang Sto. Niño  nga mosud sa Basilica mao ang El Teniente dela Guardia, nga gikan sa  San Nicolas Parish”, sumala ni Padre Tito.

“Hinumdomi    nga ubos  kita  sa  pagdumala  kaniadto sa mga Katsila dihang  ang Sto. Niño gipaila  sa Cebu. Gihatagan  siya  og  ranggo  nga El Capitan General o Captain General , ang  labing hawod  ug taas  nga ranggo  sa militar. Sukad pa  sa sinugdan, ang Sto Niñ usa ka militar  nga Sto. Niño’, dugang  pa  niya.

Maoy  hinungdan  nga  ang  Sto. Niño, suma  ni  Padre Tito, nagsul-ob  og  red cape, puwa  kay  maoy  kolor  nga  nagsimbolo  sa  usa  ka heneral. Kun  imong  sil-ingon  pag-ayo  ang  imahe  sa Balaang  Bata, matud  niya,  imong  masuta   nga  nagsul-ob  siya  og  usa  ka botas  sa sundawo ug  ang  senina  sa  imahe  gikan  sa Basilica  nagpasabot  nga  siya  usa  ka  Kapitan Heneral.

Kun ang  Heneral  mobiya  sa Basilica  alang  sa procession ang Teniente dela Guardia maoy  mopuli  aron “mobantay sa Fort”.

“Sama  sa  mga  kampo  sa  sundawo, ang heneral di  makabiya  sa kampo  nga  bakante  ug way mo hulip  kaniya. Kinahanglang  adunay  opisyal  nga  mahibilin,  nga kasagaran  naa  sa ikaduhang ranggo. Maoy  hinungdan  nga  kun  ang  El Capitan General mobiya sa Basilica  alang  sa procession aron molibot  sa Gingharian, ang Teniente dela Guardia maoy  mopuli”, suma  sa gipasabot  ni  Padre Tito.

Nganong  ang  Teniente dela  Guardia gikan man sa San Nicolas Parish?

Si Monsignor Trinidad Silva, ang  kora paruko  sa San Nicolas Parish  nagkanayon  nga ang  Basilica ug  ang San Nicolas adunay dugay  na kaayong   relasyon. “Ang San Nicolas Parish  maoy  unang  parokya  sa Cebu . Gani , gitawag  kini  nga  Pueblo Antigua. Ang Sto. Niño nga  ania  kanato  karon  maoy  giila  nga  luyoluyo  sa Sto. Niño sa Basilica. Kining  maong  tradisyon  dugay  na  nga  gisunod, apan  wa kaayo hatagi  og  dakong  pag-ila  sa kasaulogan  sa piyesta  sa Sto. Niño”, matud pa  niya. 

Kun  sa milabay nga mga tuig  ang “pagpuli” sa kamandoan sa  “Fort”  gipahigayon  sa hilom, ning tuiga, matud pa  ni Padre Tito  nga himoon  kini  sama  gayud  sa military turnover  nga  buhaton  sa  mga  tinuod  nga   mga sundawo.

“Atong balikon  ang  tradisyon  nga  sa pagkatinuod  mas karaan  na  kay  sa  Fluvial Procession ug ang Traslacion”, matud niya, nga  inubanan  sa dugang  pang panukiduki nga gihimo  sa wa pa kini disidihe nga  ang  maong  gimbuhaton  hatagan  og  dakong  pagtagad. Matud  pa ni Padre Tito  nga  nakig-estorya  na siya kang Dr. Astrid Boza, ang usa  ka  anthropologist kinsa  mipahigayon  og  subsob nga  panukiduki kalabot  sa Sto. Niño ingon  man  ang Ramon Aboitiz Foundations, Inc.

Ang administrasyon  sa Basilica del Sto. Niño nakig-alayon  usab  sa Philippine Navy, kinsa suma  kang Padre Tito, miila  sa Sto Niño nga  Lord Admiral of the Sea.

“Ang Navy miisip  sa Sto. Niño nga maoy  protector  sa kadagatan. Gani  kun ang Sto. Niño mosakay  na sa barko  sa Navy, ang bandera  niini  ipaubos  ug  ang bandera ni Sto. Niño, nga  nagpasundayag  sa  Iyang  coat  sa   mga armas, ang duhay ulo  nga  agila, ipakayab  sa itaas, nga  maoy  magsilbi  kaniya  isip nga boss  sa maong  barko”, matud pa  ni Padre Tito.

Ang El Teniente  dela Guardia, eskortan  sa  mga  opisyal  sa Navy, mobiya  sa San Nicolas Parish  unya  sa Sabado  nga iprocession  uban sa  mga  katawhan ug “mabuhi” nga Sto. Niño-mga kabataan  nga magsul-ob  og  mga senina  nga  mosundog sa Sto. Niño  gikan  sa nagkalainlaing  kultura , matud pa  ni  Monsignor Silva.

Sa di pa mobiya  ang El Capitan General sa Basilica, adunay  gamay  nga  turnover of command  nga  ipahigayon  ngadto  kang El Teniente dela Guardia, nga matud pa  ni Padre Tito, molanat  og 10 minutos.

“Ning tuiga, ang mga debotos makasabot  na  kun  unsay  panghitabo, Adunay  kahulogan  kining  maong tulumanon,” suma  ni Padre Tito. (BANAT NEWS)