CEBU, Philippines - Ang Department of Agriculture (DA)7 nga nagbase sa syudad sa Sugbo nangandam pag-ayo sa nagsingabot nga kasaulogan sa National Year of Rice (NYR) karong tuiga uban sa tema nga "Sapat na Bigas Kaya ng Pinas".
Gipadayag kini ni DA-7 Regional Executive Director Angel Enriquez sa pakighinabi sa Banat News kinsa nagkanayon nga mahinungdanon gayud nga ang publiko makabaton og hustong disiplina ilabi na sa tukma ug husto nga pagkunsomo sa bugas ug nga dili sila angay nga mag-usik-usik niini.
Dugang pa ni Enriquez nga tungod kay gitumong man gayud sa maong buhatan nga makab-ot ang Rice Self-Sufficiency karong tuiga, iyang giawhag ang mga lokal nga opisyales sa syudad ug probinsya sa Sugbo, mga nagpakabanang magpapatigayon ug uban pang ahensya sa goberno nga makig-alayon sa buhatan sa DA-7 aron motabang sa pagkab-ot sa ilang gipangandamang programa ug kampanya nga may labot sa pagbaton sa igong suplay sa bugas sa nasud.
Gibutyag ni Enriquez nga unta makig-alayon gayud ang katawhan ug nga iya usab nga gisugyot nga kun wala nay bugas sa panudlanan sa matag panimalay, ila unta nga anaron ang ilang kaugalingon sa pagkaon og mga lagutmon sama sa kamoteng kahoy, kamoteng bagon, saging, mais ug uban pang magamit nga panghulip sa bugas humay tungod kay susama ra kini nga adunay sustansya nga gitawag og carbohydrates nga mutohop gayud sa lawas sa tawo.
Gipanghinaot sa DA-7 nga pinaagi sa pagtinabangay ug pagsabot ning maong awhag, unta malampusong makab-ot ang Rice Self-Sufficiency sa nasud nga Pilipinas.
Matud pa ni Enriquez nga mao kini karon ang numero unong gihatagan og dakong prayoridad sa buhatan sa DA.
Sayo niini gisaad ni Kalihim Proceso Alcala sa DA nga sugod niining tuiga, dili na mangompra ang kagamhanan og bugas humay gikan sa mga nasud sa gawas.
Kini tungod kay gilauman na nga makabaton og igong suplay sa bugas humay ang kaumahan sa nasud nga sarang ikabuhi sa 95 milyones nga populasyon sa Pilipinas. (BANAT NEWS)