CEBU, Philippines - Gipangita ni Cebu City Mayor Michael Rama ang presensya ni OIC City Director sa Cebu City Police Office nga si Sr. Supt. Mariano Natuel ug ang mga kadagkoan sa Central Command sa gipahigayon nga panagtagbo kagahapon sa nagkadaiyang komitiba sa Sinulog 2013.
Nasayran nga representante ra sa duha ka mga buhatan ang ilang gipadala sa gipahigayong tigom kagahapon.
Nagkanayon si Rama nga importante kaayo ang maong tigom apan wala ang mga dagkong opisyal sa kapolisan ug sa kasundalohan dinhi sa syudad.
Gipadayag usab niya nga kinahanglan masiguro ang kahapsay ug seguridad sa siyudad gumikan kay daghan man unyang mga bisita ang moduaw sa dakbayan.
Giingong tulo ka mga sakop sa polis ang gipadala ni Natuel sa nahisgutang tigom.
Apan si Supt. Carmelo Dayon, deputy chief for operations sa CCPO mibutyag nga wala makatambong si Natuel sa maong tigom gumikan kay may gitambongan usab nga miting didto sa police regional office.
Nagkanayon si Dayon nga uban ni Natuel ang mga tinugyanan sa regional headquarters ug ang mga kadagkoan sa Centcom sa meeting nga kabahin gihapon sa Sinulog.
Giingong gipunting sa maong panagtagbo sa PRO-7 mao ang seguridad nga ilang ipatuman unya sa Sinulog ilabi na sa crowd control. (BANAT NEWS)