CEBU, Philippines - Nagpakitabang sa mga opisyales sa barangay ang Cebu City Anti-Mendicancy Task Force (CCAMTF) alang sa pag-monitor sa giingong makililimos nga gikan sa ubang dapit nga nagsugod na og pangabot dinhi sa Siyudad sa Sugbo gumikan sa nagsingabot na nga Sinulog.
Suma pa ni Isabelita Ganub, hepe sa CCAMTF nga dili maato ang pagpaniid niini kung ang ilang grupo lang ang maglihok sa pagsusi niining maong mga makililimos gumikan kay kuwang sila og tawo.
Matud pa ni Ganub nga gawas nga kuwang sila og tawo, usa ra usab ang ilang sakyanan nga gamiton sa ilang mga kalihokan.
Matud pa niya nga mas dako og mabuhat ang taga barangay tungod kay sila ang suhito sa mga tawo sa ilang lugar busa dali nilang mapanid-an kun may mga bag-ong makililimos nga moabot sa ilang dapit.
“Ang uban man gud nga makikilimos kay amo ra nga mga tawo ang bantayan, managan dayon inigkita sa among sakyanan,†matud pa ni Ganub.
Midugang siya nga base sa listahan nila sa miaging tuig nakalista sila og mga makililimos nga gikan sa Mindanao ug sa ubang parte sa Kabisay-an sama Bohol ug Negros.
Nakamonitor usab sila sa mga giingong makililimos nga gikan sa nagkadaiyang dapit sa Probinsya sa Sugbo.
Usa sa gibantayan sa ilang grupo mao ang giingong mga rapper nga mokalit lang og angkas sa mga pampublikong sakyanan ug magpakilimos bisan maayo sila og lawas.
Matud pa ni Ganub nga bisan human na ang pasko nagpadayon gihapon kining maong mga rapper sa pagsaka sa mga PUJ nga mokanta og way klarong kanta duyogan sa ilang mga kamot, ug baba dayon mangayo og kuwarta sa mga pasahero, busa sila ang mosanta niini.
Kini tungod kadaghan na sila makadawat og report nga kining grupoha kun way madawdaw nga limos sa mga pasahero manglabni sa mga bag ug alahas sa mga sumasakay.
Mapasalamaton hinuon si Ganub gumikan kay mipasalig man nga motabang sa ilang operasyon ang Prevention Restoration Order Beautification and Enhancement (Probe) .
Base sa City Ordinance 1631 nga adunay nagtangag nga multa nga P1,000 kutob sa madakpan sa akto nga mohatag og limos sa makililimos. (BANAT NEWS)